Özbəkistan su qıtlığı şəraitində kənd təsərrüfatını müasirləşdirir

Özbəkistan məhdud torpaq və su ehtiyatlarından daha səmərəli istifadə etməklə kənd təsərrüfatında istehsalı artırmağa çalışır. Ölkə yeni əkin üsulları, müasir suvarma sistemləri və rəqəmsal texnologiyalar tətbiq edir. Hökumətin məqsədi 2030-cu ilə qədər qida ixracını 10 milyard dollara çatdırmaqdır. Hazırda ölkədə hər il təxminən 26 milyon ton meyvə-tərəvəz istehsal olunur və məhsullar 92 ölkəyə ixrac edilir. Əsas diqqət əkin sahələrini genişləndirmədən daha çox məhsul əldə etməyə yönəlib. Xüsusilə müasir bağçılıq üsulları məhsuldarlığı artırır. Ənənəvi bağlarda bir hektardan 7-10 ton məhsul alınırdısa, yeni texnologiyalarla bu göstərici 30-35 tona, bəzi hallarda isə 60 tona çatır.

Ölkənin əsas problemlərindən biri su qıtlığıdır. İstifadə olunan suyun təxminən 90%-i kənd təsərrüfatının payına düşür. Buna görə suvarma sistemlərinin yenilənməsinə 200 milyon dollarlıq layihə ayrılıb. Layihə nəticəsində hər il təxminən 540 milyon kubmetr su itkisinə qənaət edilməsi gözlənilir. Bununla yanaşı, Özbəkistan kənd təsərrüfatında dronlardan, peyk monitorinqindən və süni intellektdən istifadəni genişləndirir. Fermerlərə güzəştli kreditlər və subsidiyalar da təqdim olunur. Bütün bu addımlara baxmayaraq, ölkə bitki yağı və şəkər kimi bəzi ərzaq məhsullarını hələ də xaricdən idxal edir.