Çin Ay missiyasından əvvəl pilotsuz sınaq keçirəcək

Çin ilk ekipajlı Ay missiyasına hazırlıq çərçivəsində Ay modulunun pilotsuz sınaq uçuşunu həyata keçirməyi planlaşdırır. 2030-cu ilə nəzərdə tutulan missiyadan əvvəl keçiriləcək sınaq eniş, qalxma və kosmik gəmi ilə birləşmə kimi əsas əməliyyatların yoxlanılmasına imkan verəcək.

CCTV News-un məlumatına görə, sınaqda iki Uzun Marş 10 (Changzheng-10) raketindən istifadə olunacaq. Birinci raket Ay eniş modulunu, ikinci raket isə üç astronavt daşımaq üçün nəzərdə tutulan Mengzhou kosmik gəmisini orbitə çıxaracaq. Hər iki aparat Ay orbitində birləşəcək. Eniş modulu isə iki astronavtı Ay səthinə endirmək və geri qaytarmaq üçün nəzərdə tutulub.

Çin bundan əvvəl Mengzhou kosmik gəmisini və raketin Yer orbitində işləyən versiyasını da sınaqdan keçirməyi planlaşdırır. Bu mərhələdə kosmik gəminin uçuş və Yerə qayıdış sistemləri yoxlanılacaq.

Pilotsuz Ay missiyası zamanı səthin temperaturu, Ay tozunun xüsusiyyətləri və texniki sistemlərin fəaliyyəti haqqında məlumatlar toplanacaq. Eniş modulunun Ay orbitinə daxil olması, eniş etməsi, səthdən qalxması və yenidən kosmik gəmiyə qoşulması da sınaqdan keçiriləcək.

Çinin əsas məqsədi bütün texniki və əməliyyat mərhələlərini əvvəlcədən yoxlayaraq 2030-cu ildə ilk ekipajlı Ay enişini həyata keçirməkdir.