Nvidia-da rekord gəlir: Şirkətin üçüncü rüb nəticələri gözləntiləri üstələdi
Şirkətin əsas gəlir mənbəyi süni intellekt məlumat mərkəzləri olub.

Nvidia 25 oktyabrda başa çatan maliyyə ilinin üçüncü rübündə 115,8 milyard dollar gəlir əldə edərək yeni rekorda imza atıb. Bu, əvvəlki rüblə müqayisədə 20%, ötən ilin eyni dövrü ilə müqayisədə isə 103% artım deməkdir. Şirkətin gəliri analitik gözləntilərini də üstələyib. Belə ki, Nvidia rüb üzrə 108 milyard dollar gəlir proqnozlaşdırmışdı.
Şirkətin əsas gəlir mənbəyi süni intellekt məlumat mərkəzləri olub. Bu istiqamətdə gəlirlər illik müqayisədə 110% artaraq 107,6 milyard dollara çatıb. Oyun və fərdi kompüter məhsullarını əhatə edən bölmənin gəliri isə 42% artaraq 8,2 milyard dollar təşkil edib.
Nvidia-nın xalis mənfəəti 65,3 milyard dollara yüksəlib. Bu, ötən ilin eyni dövrü ilə müqayisədə 105% artım deməkdir. Səhm başına qazanc 2,70 dollar, ümumi mənfəət marjası isə 74,8% olub.
Şirkət növbəti rüb üçün də yüksək nəticələr gözləyir. Nvidia dördüncü rübdə gəlirlərinin 130 milyard dollara çatacağını proqnozlaşdırır. Bundan əlavə, şirkət yeni nəsil Vera Rubin NVL72 sistemlərinin istehsalına və çatdırılmasına başladığını açıqlayıb.
Qeyd edək ki, Nvidia bu rübdə səhmlərin geri alınması və dividendlər vasitəsilə səhmdarlarına 28,1 milyard dollar vəsait qaytarıb.