Sosial media şirkəti Twitter Tesla və SpaceX-in baş direktoru Elon Musk-ın şirkəti satınalmasının qarşısını almaq üçün məhdud müddətli səhmdar hüquqları planını təsdiq etdi.
Elon Musk Twitter-i bir səhm üçün 54,2 dollara almağı təklif etdikdən sonra Twitter “zəhərli həb” adlı bir tədbir gördü.
Twitter-də edilən açıqlamada şirkətin idarə heyətinin məhdud müddətli səhmdar hüquqları planını yekdilliklə təsdiqlədiyi bildirilib. Açıqlamada idarə heyətinin Twitter-i almaq üçün tələb olunmayan, məcburi olmayan təklifdən sonra planı təsdiqlədiyi bildirilib.
Bildirilir ki, sözügedən tədbir potensial alıcılardan başqa mövcud səhmdarların şirkətdə daha ucuz qiymətə daha çox səhm almaq hüququnu qoruyur.
Qeyd edilir ki, Musk və ya başqa bir investor şirkətin səhmlərinin 15 faizindən çoxunu alarsa, plan işə düşəcək.
Bildirilir ki, Twitter İdarə Heyəti tərəfindən görülən bu tədbir Musk-ın alış cəhdini dayandıra bilməz, lakin alışı daha da bahalaşdıra və ya Musk-ı danışıqlar masasına oturmağa məcbur edə bilər.
Daha əvvəl Twitter-də 9,2 faiz pay alan Musk ABŞ Qiymətli Kağızlar və Birja Komissiyasına (SEC) verdiyi açıqlamada bütün Twitter üçün hər bir səhm üçün 54,2 dollar təklif etmişdi.
Twitter-in İdarə Heyətinin sədri Bret Taylor-a yazdığı məktubda Mask Twitter-dən səhmlər aldığı üçün şirkətin indiki formada inkişaf etməyəcəyini anladığını, Twitter-in özəl bir şirkət kimi çevrilməsi lazım olduğunu bildirib.
Twitter-dən aktiv şəkildə istifadə edən Musk-ın platformada 80 milyondan çox izləyicisi var. Musk-ın cari aktivlərinin 260 milyard dollardan çox olduğu bildirilir.
Digər tərəfdən, aprelin 11-də Twitter-in CEO-su Parag Agrawal şirkətdən pay alan Elon Musk-ın daha əvvəl elan etdiyi Twitter İdarə Heyətində olmayacağını açıqlamışdı.
Bu arada Twitter-in keçmiş səhmdarları şirkət səhmlərinin alınmasında qanunu pozduğuna görə Musk-ı Nyu York əyalət məhkəməsinə şikayət edib. Səhmdarlar iddia edirdilər ki, Twitter səhmlərinin satın alındığını gec elan etməklə Musk sosial media şirkətinin səhmlərinin dəyərinin artmasının qarşısını alıb və bununla da bəzi keçmiş səhmdarlara zərər vurub.
