Rusiya və İran qlobal bank ödənişləri üçün kritik rabitə sistemi olan SWIFT-ə qadağa qoyulduğu üçün öz bank sistemlərini inteqrasiya edirlər.
Bir neçə İran Mərkəzi bankının rəsmisi bazar ertəsi Rusiyanın Mərkəzi bankı ilə tərəfdaşlığı təsdiqləyib. Lakin Rusiya Mərkəzi Bankı məsələ ilə bağlı şərh verməkdən və öz saytında rəsmi açıqlama verməkdən imtina edib.
İran və Rusiya tərəfindən hazırlanan yeni rabitə sistemi təxminən 700 Rusiya bankını və 13 digər ölkədən 106 xarici bankı birləşdirəcək. Son hesabata görə, Rusiya İranla ticarət həcmini ildə 10 milyard dollara çatdırmaq üçün yeni sistemdən istifadə etməyi hədəfləyir. Rusiya, həmçinin ABŞ dollarına meydan oxumaq və qızılla dəstəklənən kriptovalyuta hazırlamaq üçün İranla işləməyi planlaşdırır.
İran Mərkəzi Bankının müdir müavini Möhsün Kərimi yerli xəbər agentliyinə deyib: "İran banklarının Rusiya bankları ilə artıq SWIFT-dən istifadə etməsinə ehtiyac yoxdur".
İranın baş mərkəzi bankiri Məhəmməd Fərzin isə Twitter hesabında bildirib ki, “İran ilə dünya arasında maliyyə kanalı təmir olunur”.
İran bankları SWIFT-dən ilk dəfə 2018-ci ildə, ABŞ mühüm nüvə sazişindən çıxdıqdan sonra İrana qarşı sanksiyaları bərpa etdikdən sonra çıxarılıb. Keçən il Rusiyanın Ukraynaya müdaxiləsindən sonra bəzi Rusiya banklarına da kommunikasiya sisteminə qadağa qoyulmuşdu.
SWIFT-ə qadağa qoyulması hər iki ölkənin bank sistemi üçün ciddi nəticələrə gətirib çıxardı. Çünki Belçikada yerləşən mesajlaşma şəbəkəsi banklar arasında maliyyə əməliyyatlarını asanlaşdırmaq üçün çox vacibdir. SWIFT 200-dən çox ölkədə 11 000-dən çox maliyyə institutunu əlaqələndirir və gündə orta hesabla 42 milyon proses icra olunur.
Qadağa həm də Rusiya və İranı xarici valyuta ehtiyatlarından təsirli şəkildə bloklayır və bu, onların müvafiq iqtisadiyyatlarını maliyyələşdirməyi çətinləşdirir.
