"Apple"ın səs köməkçisi "Siri"nin "OpenAI"ın "ChatGPT" chatbot-u qədər güclü olmaq şansı yoxdur. Bunu "Apple"ın keçmiş əməkdaşı "The New York Times"a bildirib.
2014-cü ildə "Siri"ni təkmilləşdirmək tapşırılan və 2016-cı ildə şirkətdən ayrılan keçmiş "Apple" mühəndisi John Burkey bildirib ki, "Siri"nin mürəkkəb dizaynı yeni funksiyalar əlavə etməyi çətinləşdirir.
"Siri" "Hava necədir?" kimi sadə sorğulara cavab verə bilir. O, yalnız məhdud sayda sorğuları başa düşə bilir. Bu o deməkdir ki, mühəndislər onun imkanlarını genişləndirmək üçün verilənlər bazasına yeni sözlər əlavə etməlidirlər.
Lakin "Siri"nin verilənlər bazasını "bir böyük qartopu" adlandıran Burkey, verilənlər bazasının yenidən qurulması tələb olunduğu üçün yeni ifadələrin əlavə edilməsinin altı həftəyə qədər çəkə biləcəyini söylədi. Ona "ChatGPT" kimi qabaqcıl xüsusiyyətlərin inteqrasiyası təxminən bir il çəkə bilər. Onun sözlərinə görə, hətta "Siri"nin əsas xüsusiyyətlərini yeniləmək onun köhnəlmiş, mürəkkəb koduna görə həftələr çəkə bilər.
Bu yaxınlarda "OpenAI"a 10 milyard dollar xərcləyən "Microsoft"un baş direktoru Satya Nadella bu ay "The Financial Times"a bildirib ki, "Siri" və "Amazon"un "Alexa" kimi səs köməkçiləri “daş kimi axmaqdır”.
"Siri"nin yaradıcısı Adam Cheyer bu fikirlərlə razılaşıb. O da FT-yə bildirib ki, "ChatGPT"nin esse yazmaq və kod inkişaf etdirmək bacarığı mövcud səs köməkçilərini axmaq göstərir.
"Apple"a gəlincə isə, onun "Siri" komandasının əməkdaşlarının süni intellekt dili modellərini sınaqdan keçirdiyi bildirilir. Buna baxmayaraq hələlik heç bir məhsul elan olunmayıb.
