Nazirlər Böyük Britaniyanı dünyanın ən sürətlə inkişaf edən texnologiya sahələrindən birində rəqabətə davamlı saxlamaq məqsədi ilə kvant hesablamalarına 2,5 milyard funt sterlinq sərmayə qoymaq üçün 10 illik proqrama başlayırlar.
"Whitehall"a görə, "Kvant Planı" hazırkı 1 milyard funt sterlinqlik "Milli Kvant Texnologiyaları Proqramı" çərçivəsində sənaye və universitetlərdə tədqiqatçılara ayrılan maliyyəni iki dəfədən çox artıracaq. Proqram Britaniyanı “növbəti Silikon Vadisi”nə çevirmək üçün hökumət vədinə daha çox pul qoymaq məqsədi daşıyır.
Harwell Kampusunda tamamlanmaq üzrə olan Milli Kvant Hesablama Mərkəzi genişləndirilmiş proqramda aparıcı rol oynayacaq. Lakin hökumət "gələcək tədqiqat mərkəzləri şəbəkəsi" yaratmaq üçün təkanların bir hissəsi kimi ölkə daxilində dəstəyi yaymağı hədəfləyir.
Londonda yerləşən kvant investisiya şirkəti "Quantum Exponential"ın baş icraçı direktoru Steve Metcalfe "Böyük Britaniya hökumətinin kvant öhdəliyini görməkdən çox məmnunuq" deyə bildirdi.
Lakin o əlavə etdi: “Bazar yaratmaq üçün bizə hökumət və investisiya icması arasında birgə yanaşma lazımdır. Bu, pensiya fondları kimi sahələri əhatə edən başlanğıc sərmayənin lazımi səviyyədə olmasını təmin etməkdə, Böyük Britaniya sənayenin sürətləndirilməsində və kommersiyalaşdırılmasında mühüm rol oynayır”.
Müdafiə Nazirliyinə kvant kompüteri satan "Orca Computing" şirkətinin rəhbəri Richard Murray hökumətin təklifinin "böyük potensiala" malik olduğunu söylədi.
“Böyük Britaniya kvant innovasiyaları üçün ocaqdır. İndi bizim həqiqətən də kvant texnologiyalarını daha da praktik istifadəyə çevirmək şansımız var. Xüsusən də güclü olduğumuz hesablamalarda”.
Kvant mexanikasının prinsipləri əsasında işləyən kompüterlər nəzəri cəhətdən geniş verilənlər bazalarının axtarışı və yeni materialların layihələndirilməsi kimi müəyyən tipli problemlərin həlli üçün adi kompüterlərin gücünü xeyli ötə bilər. Lakin onların praktik tətbiqi nəhəng texniki problemlərlə üzləşir. Xüsusən də bugünkü eksperimental kvant cihazlarında yaranan səhvləri düzəltmək problem olaraq qalır.
Kvant sektorunda ABŞ və Çin üstünlük təşkil edir. Onların hökumətləri, həmçinin "Google" və "IBM" kimi böyük texnologiya şirkətləri kvant texnologiyasına milyardlarla dollar sərmayə qoyurlar.
"Sifted" tərəfindən keçən ay dərc edilən sorğuya görə, Böyük Britaniya kvant startaplarının sayına görə Avropanın qalan hissəsini xeyli qabaqlayır. Yeni hökumət proqramı investisiya dəstəyi ilə xaricdən Böyük Britaniyaya köçmək üçün kvant bizneslərini cəlb edərkən yerli şirkətləri inkişaf etdirmək məqsədi daşıyır.
